वर्ल्ड इज फ्लैट आ एडिनबर्ग:

एडिनबर्ग शहर मे आबए सँ किछु दिन पहिने हम थामस फ्रेडमेन लिखित किताब “द वर्ल्ड इज फ्लैट” पढ़ने छलहुँ. लेखक कहैत छथि जे दुनियाँ आब गोल नहि सपाट अछि. धरती केँ सपाट करबाक बहुत कारण छैक जाहि मे बर्लिन’क दीबार’क ढाहनाय (पूर्वी जर्मनी आ पश्चिमी जर्मनी के विलय), ब्रौडबैन्ड इन्टरनेट,   कम्प्यूटर साफ्टवेयर, ओपेन सोर्स, अमेरिका’क काम-काज केँ भारत मे आउटसोर्सिँग,  व्यक्तिगत कम्प्यूटर उपकरण (मोबाइल, लैप्टोप, पी.डी.ए) इत्यादि दुनियाँ मे कोनो भी दू टा अन्जान व्यक्ति के पास आनि देलक. तेँ २१वीँ शदी मे दुनियाँ सपाट भऽ गेल.

लागैत अछि फ्रेडमेन साहेब एडिनबर्ग शहर मे नहि घुमलाह, नहि तऽ एहेन बात कहियो ने कहि सकैत छलैथि.  एडिनबर्ग एकटा एहेन शहर अछि जाहि मे विकास बहुत भेल अछि मुदा पुरातन सभ्यता सँ कोनो छेड़-छाड़ नहि काएल गेल अछि. फ्रेडमेन सहाब भारत मे बहुत दिन धरि रहलाह आ भारत मे धोती कूर्ता सँ जीन्स टी शर्ट मे बदलैत सभ्यता पर दुनियाँ के एके शब्द मे सपाट कहि देलाह,  एडिनबर्ग मे देखलहुँ जे गली गली मे पारम्परिक परिधान’क दोकान छलैक. एतय जेन्टलमेन’क पारम्परिक परिधान मे होइत छैक स्काटलैन्ड’क रँग मे स्कर्ट, सर्ट, विशेष टाई, विशेष फर वाला टोपी पैर सँ एक फीट ऊँच जूता एकटा मफलर इत्यादि. एतुका स्थानीय लोक सँ पुछलहुँ ते पता चलल जे एतय कोनो भी पारम्परिक काज त्योहार मे, शादी विवाह’क मौका पर लोक सब इएह पारम्परिक परिधान पहिरैत अछि. दोकान सब मे जा जा केँ एतुका पारम्परिक परिधान के बिकैत देखि मोन प्रसन्न भऽ गेल.  एतुका लोक कहलक जे एतुका सँस्कृति के सेहो अमेरिका सँ खतरा अछि.  ई गणना एत्तेक कम्प्लेक्स छैक जे बुझि मे नहिँ आयल जे एना अमेरिके सँ पूरे दुनियाँ के किएक खतरा छैक आ तैयो दुनियाँ सपाट किएक छैक.

एहि बात सँ एकटा आओर बात याद आबि गेल. बात बात मे एतुका लोक जेन्टमेन’क प्रयोग करैत छथि. आधूनिक बँग्ला भाषा मे सेहो भद्रो-पुरुष आ भद्रो महिला’क प्रयोग बारम्बार होइत छैक. एकटा बँगाली मित्र सँ विवाद भऽ गेल हम जवाब देने छलहुँ जे मिथिला मे रहय वाला प्रत्येक आदमी भद्र पुरुष होइत छथि आ प्रत्येक महिला भद्र महिला होइत अछि. तेँ हमरा लोकनि भद्र शब्द’क उपयोग नहि करैत छी. इ तऽ भेल मजाक वाला बात. असल बात ई अछि जे कलकत्ता मे अन्ग्रेज’क असर सबसँ बेसी पड़ल अछि तेँ बँग्ला भाषा मे जेन्टलमेन’क सीधे अनुवाद कए भद्रो पुरुष कए दैत छथि.

जेना पहिल भाग मे लिखने छलहुँ एडिनबर्ग शहर मे भारते जेकाँ फूटपाथ पर समान बेचल जाइत छैक. भारत जेकाँ ओतेक दोकान फूटपाथ पर नहि रहैत छैक मुदा एक दू टा दोकान कतओ ने कतओ अवश्ये भेट जायत. पहिल बेर देखलहुँ जे ठेला पर शराब बिकैत. फूटपाथ पर उनी कपड़ा बिकैत. एक जगह त पथिया मे उनी कपड़ा बिकैत छल आ हम अपन कैमरा मे ओकरा सहेज लेलहुँ जे बगल वाला फोटो मे अछि. बहुते अजीब सन लागैत अछि जखन हर जगह भीड़ मे एहेन आदमी भेटि जायत जे जवान अछि आ सिर सँ पैर धरि उनी कपड़ा सँ लदल अछि. ओहि ठाम ओही जगह पर देखऽ मे आबि जायत जे एकटा बुढ़ आदमी केवल एकटा टीशर्ट पहिरने ठाढ छथि. ई बात हम तखन कहि रहल छी जखन बाहर’क तापमान १२ डिग्री सेन्टिग्रेड छल हवा एत्तेक जोर सँ चलि रहल छल जे हम एकटा स्वेटर मे काँपि रहल छलहुँ.

चूँकि स्काटलैण्ड उत्तरी ध्रूव सँ भारत के अपेक्षा बेसी निकट अछि तेँ एतय दिन राति अवधि मे अन्तर होइत छैक. एतुका स्थानीय समयानुसार साढ़े तीन बजे सूरज भगवान एगि जाति छथि, आ राति मे साढ़े नओ बजे धरि उगल रहैत छथि. एकर मतलब एतय राति केवल छओ घँटा के आ दिन अठारह घँटा के होइत अछि. मुदा ठँड’क मौसम मे ई उल्टा भऽ जाइत छैक. चूँकि राति आ दिन’क अवधि मे एत्तेक फड़क पड़ैत छैक तेँ सोचलहुँ जरूर एतुका जीवन यापन मे एकर असर पड़ना चाही. पहिने हम अपने सँ शुरु करब. राति केँ जखन साढे नओ बजे जखन हम सूतय लेल जाइत छलहुँ ते खिड़की’क पर्दा’क दोग सँ सूरज भगवान नुका छिपि खेलैत छलाह. नीक सँ सूतियो ने पाबी की साढ़े तीन बजे नूका छिपि फेर सँ शुरु भऽ जाए. एतुका लोक सब कोना मैनेज करैत छथि से भगवान जानैथि.
राति दिन’क अन्तर सँ एतुका लोक मे असर के खोज केनाय शुरु केलहुँ. सबसँ पहिने जे देखलहुँ ओ छल स्कूल मे बच्चा सबकेँ एनाय आ जेनाय. देखलहुँ एतय लगभग दस बजे बच्चा लोकनि स्कूल जैत छथि आ चारि बजे छुट्टी भऽ जाइत छैक. अचानक याद आबए लागल हमरो लोकनि तेँ एहिना पढ़लहुँ. रोज दस बजे खाना खा केँ स्कूल आ चारि बजे छूट्टी. मुदा भारत आब’क स्कूल तऽ सात-आठ बजे सँ एक-दू बजे धरि होइत छैक से अन्तर किएक. बुझि मे आयल कोलोनियल हैन्ग ओवर एखन धरि गेल नहि अछि. अन्ग्रेज लोकनि दस सँ चारि धरि स्कूल चलौलैथि आब तथाकथित दुनियाँ’क सपाट भेला’क बाद मतलब अमेरिकी कानवेन्ट स्कूल हिसाब सँ सात सँ एक बजे धरि चलैत छैक. मतलब ई जे ईग्लिश हैन्ग ओवर सँ अमेरिकन हैँगओवर. बिहार सरकार सेहो सात सँ एक बजे धरि स्कूल कऽ देने अछि.

एहि सँ पहिने की दिन राति के अन्तर सँ पड़ैत जीवन यापन के बाँकी असर केँ बताबी, एकटा घटना याद आबि रहल अछि. हमरा आ हमर कनियाँ मे ओतुबी अन्तर छैक जेना उत्तरी ध्रूव आ दक्षिणी ध्रूव. हम एकटा अविकसित गाम’क घटिया सन स्कूल मे पढ़ने छी तऽ हमर कनियाँ बिहार’क सबसँ नीक स्कूल मे सँ एक नोट्रेडेम एकेडमी मे पढ़ने छथि. बहुत जानल बात अछि जे हुनकर अन्ग्रेजी हमरा सँ बढ़ियाँ छन्हि. मुदा एक दिन हम कनियाँ केँ पुछि देलिअन्हि जे बताबु जे डिनर ककरा कहल जाइत छैक. कनियाँ एत्तेक छोट प्रश्न जवब देनाइ अपन प्रतिष्ठा के खिलाफ बुझैत छलीह ते जवाब आसानी सँ नहि दैत छलीह. हम चुनौती देलिअन्हि ते कहलैथि “डिनर मतलब राति’क खाना”.

हम कहलिअन्हि जे डिनर के मतलब होइत अछि दिन’क खाना . हुनका पहिने विश्वास नहि होइत छलन्हि. आक्स्फोर्ड’क डिक्शनरी निकालि केँ देखा देलिअन्हि ते विश्वास भेलन्हि. मुदा बाद मे ओहो सोच मे पड़ि गेलीह जे एना किएक. दिन’क खाना केँ तऽ लन्च कहल जाइत छैक. पहिने हमरो बुझल नहि छल. एडिनबर्ग एला सँ सब शँका दूर भऽ गेल. एतय साँझ’क साढे सात बजे डिनर के नाम पर खाना शुरु होइत छैक. जखन ई तथाकथित खाना शुरु होइत छैक सूरज भगवान ओहने चमकैत छथि जेना मार्च’क महीना मे दिन’क तीन बजे भारत मे चमकैत अछि. डिनर पूरे चौबीसो घँटा के सबसँ महत्वपूर्ण खाना होइत अछि आ सूरज उगल रहले पर खायल जायत छैक ते ओकरा दिन’क खाना कहल जाइत छैक.

एहि रचना केँ हम एकटा यात्रा वृताँत’क भाँति लिखय चाहैत छलहुँ. मुदा एडिनबर्ग शहर’क बारे मे अपन अनुभव केँ लिखि तऽ एकटा किताब तैयार भऽ जायत. अपन पेशा मे अपन जरूरत के देखैत एना नहि कऽ सकैत छी. शहर बहुत घुमलहुँ मुदा एडिनबर्ग शहर सन नहि देखलहुँ. विदेश मे रहलोपरान्त भारत’क याद ताजा करैत अछि. ओएह लेफ्ट हैन्ड ड्राइव, सड़क पर चलैत लोक, घास’क पैघ पैघ मैदान, ओहि मे कैनवस’क गेन्द सँ क्रिकेट खेलाइत बच्चा, अपेक्षाकृत बेसी शुद्ध अन्ग्रेजी बाजैत लोक, अतिथि के सत्कार करैत लोक, यूनिवर्सिटी मे चहल पहल, जमि के खाना खाइत लोक. एहि रचना केँ खतम कऽ रहल छी, एहि यात्रा वृताँत के नहिँ. चाहे तऽ पूरा वर्णन करबाक लेल हमरा लग शब्द नहि अछि वा एकरा वर्णन करबाक लेल शब्द बनले नहि अछि.

आगमन:

हम परसू यानी जून १६, २००८ के दिन मे १२ बजे एडिनबर्ग पहुँचलहुँ. एहि सँ पहिने अमेरिका के किछु शहर घुमने छलहुँ आ मोन मे छल जे एडिनबर्ग सेहो कोनो विकसित देश’क कोनो पैघ शहर सन होयत. मुदा एयरपोर्ट सँ टैक्सी सँ जहिना शहर मे प्रवेश कायल, लागैत छल जे हम राति ३ बजे (जखन भीड़ कम रहैत छैक आ रिक्शा, ठेला, रेहड़ी वाला नदारद होइत छैक)मुम्बई के विक्टोरिया टर्मिनल सँ गेटवे आफ ईन्डिया जा रहल छी. ओएह आवो हवा, ओएह गली. ओएह फूटपाथ. टैक्सी आगू बढ़ल तऽ लागय लागल जे कलकत्ता के कालेज स्ट्रीट पहुँचि गेल छी. ओएह पूरान बिल्डिन्ग काई लागल जगह जगह हरियर-कारी दीवार, कम चाकर सड़क, ओहि पर चलैत लोक. जतय अमेरिका के सड़क पर लोक नहि केवल मोटर गाड़ी दौड़ैत छैक ओतय सँ भिन्न एतय देखलहुँ जे लोक सब ओहिना चलि रहल अछि जेना इण्डिया मे, मोन खुश भऽ गेल. 

हम अपन रुकबाक व्यव्स्था यूनिवर्सिटी आफ एडिनबर्ग के गेस्ट हाउस मे करबा नेने छलहुँ, आ गेस्ट हाउस परिसर मे घुसिते लागय लागल जेना इलाहाबाद विश्वविद्यालय मे घुसि गेल छी. ओहिना छात्र लोकनिक हलचल. हमर कमरा छोट छल बाद मे बुझि मे आयल जे ई सब कमरा अतिथि छात्र लोकनिक लेल अछि. एकटा बात आओर एतय सेहो छात्रावास केँ “हाल आफ रेजिडेन्स कहल जाएत छैक, जेना आई आई टी मे कहल जाएत छैक. अचानक याद आबि गेल अपन पापा जी गप्प जखन हमर एडमिशन के कागज भेटल छलन्हि आ ओहि मे लिखल छल जे रहबाक लेल एकटा हाल आफ रेजिडेन्स मे भेटत. पापाजी फेर मे पड़ि गेल छलाह जे कोनो हाल मे किओ कोना रहत. बिल्कूल इलहाबाद विश्वविद्यालय सन देखऽ मे लागय वाला एहि विश्वविद्यालय मे बहुत देर तक घुमैत रहलहुँ. फेर घर पर अपन पत्नी आ माँ आ पापा केँ बारी बारी सँ फोन केलहुँ. फेर इन्टरनेट कीनि सर्फ करय लागलहुँ. एतय एकटा अन्तर देखलहुँ जतय इन्डिया मे २५० रुपैया मे १ महीना’क इन्टरनेट भऽ जाइत छैक मुदा एतय एक घँटा के तीन पाउण्ड पैसा लागि गेल मतलब २५२ टाका मे एक दिन’क इन्टरनेट. ओना खर्चा तऽ हमर कम्पनी’क भऽ रहल छल मुदा भारत के कन्ज्यूमर ताकत के एहसास अपने भऽ गेल जतय २० पैसा मे एकटा लोकल काल आसानी सँ भऽ जाइत छैक आ जतय ३०० टाका मे जिन्दगी भरि’क लेल फोन कनेक्शन भऽ जाइत छैक.
आबिते देरी पेट मे जोर सँ भूख लागल छल. गेस्ट हाउस परिसर मे जा केँ किछु ब्रेड वगैरह किनलहुँ आ पत्नी’क देल चूड़ा-चिनियाँबादम’क भूजा सँ खाना खेलहुँ. काफी मशीन मे कफी बना खाना सम्पन्न केलहुँ. कुन्दन जी सँ गप्प होइत छल ओ आलू-चना के तरकारी बनेने छलाह आ रोटी सँग खा के हमरा सँ चैट करैत छलाह. मुँह मे पानि आबि गेल. मुदा कायल किछो नहि जा सकैत छल. यायावरी इएह टा दू:खदायी क्षण होइत छैक. अक्सर हम अपन पत्नी के कहैत रहैत छिअन्हि, “जिन्दगी मे आदमी के दोएटा चीज’क जरूरत अछि- एकटा इन्टरनेट दोसर दालि-भात-तरकारी. इन्टरनेट ते कीनि नेने छलहुँ मुदा दालि भात तरकारी’क कोनो जोगाड़ देखबा मे नहि आबि रहल छल. जननी जन्मभूमिश्च स्वर्गादपी गरीयशी कहय वाला व्यक्ति बहुत बुद्धिमान छलाह. जननी तऽ जन्म दैति छथि मुदा जन्म भूमि मे दालि-भात-तरकारी भेटैत छैक तेँ स्वर्गादपी गरीयशी. यदि जन्मभूमि मे दालि भात तरकारी भेटनाई बँद भऽ जैक ते एहि श्लोक सँ गरीयशी कहिया उठा लेल गेल होयत (एहेन हमर कहनाई अछि).

राष्ट्रीय सँग्रहालय मे स्वागत:

जखन मैट्रिक मे पढ़ैत छलहुँ ते गाम’क किछु लोक पुछैत छलाह, सँस्कृति ककरा कहल जाइत छैक. बहुत दिन बात पापाजी बुझने छलाह जे खान पान, रहन सहन, पर्व त्योहार सबसँ मिलि केँ सँस्कृति बनैत छैक. हम एडिनबर्ग एकटा अन्तरराष्ट्रीय सम्मेलन मे आयल छलहुँ. सम्मेलन के आयोजककर्ता के दिसि सँ एकटा स्वागत भोज देल गेल छल. ई स्वागत भोज एडिनबर्ग के राष्ट्रीय म्यूजियम मे छल. पहिने सूनि के अजीब सन लागल. जे म्यूजियम मे कोन तरहक भोज सम्भव छैक. मुदा बाद मे किओ कहलक जे म्यूजियम मे पूरातन वस्तू के देखैत खाना खायल जेतैक. पहिने सँ मोन बनेने छलहुँ जे भोज मे जमि के खायब नहि जानि ओकर बाद कोनो नीक जगह भेटत वा नहि.

समय’क हिसाब सँ स्थानीय समय’क हिसाब सँ ठीक साढ़े छओ बाज साँझ के एकटा अमेरिकन प्रोफेसर के सँग म्यूजियम पहुँचि गेलहुँ. गेट पर दू-तीन मिनट बाट ताकय पड़ल होयत. ओकर बाद हठाते एकटा आदमी बिल्कूल बहुरूपिया’क पोशाक मे गेट पर आबय लागल. बाद मे बुझि मे आयल जे ओ स्काटलैण्ड राज्यक सैकड़ोँ साल पुरान पारम्परिक पोशाक छल. हुनका हाथ मे एकटा अजीब सन बाद्ययँत्र छल. ओ ओहि वाद्ययँत्र सँ बहुत बढ़ियाँ धून निकालय लागल. स्थानीय लोक बुझेलक जे प्राचीन स्काटलैण्ड मे राजा’क इएह पोशाक पहिरि केँ एहि प्रकारक धून सँ स्वागत काएल जाएत छल. लगभग तीन सय लोक एहि अन्तरराष्ट्रीय सम्मेलन मे भाग नेने छलाह. हुनका लोकनिक स्वागत एहि राजसी सँगीत सँ भेल से जानि मोन गदगद भऽ गेल.  कतओ पढ़ने छलहुँ जे यदि कोनो स्थान केर सँस्कृतिक परीक्षा लेबाक होमय तऽ ओतुआ अतिथि सत्कार देखबाक चाही. अतिथि देव भव. स्काटलैन्ड सेहो एहि बात मे विश्वास करैत छैक. स्काट्लैन्डक सँस्कृति ओहि मामला मे एक सौ प्रतिशत स्मृद्ध बुझना गेल. ओहि पारम्परिक परिधान सँ सुसज्जित केवल एकटा कलाकार सँ मँत्रमूग्ध करए वाला सँगीत सँ स्वागत करय वाला स्काट्लैन्ड’क सँस्कृति बहुत महान अछि. नीचा मे देल गेल हमरे द्वारा लेल गेल वीडियो देखल जाए. कैमरा केँ घुमा के हम अपना आप केँ आनबाक कोशिश केने छी  

एहि नेशनल मुजियम मे बहुत देर छलहुँ. खाना मे तरह तरह के शाराब, ब्रेड’क आइटम, माँस’क आइम आ चिकेन टिक्का छल. भारतीय खाना के मसालेदार कहय वाला यूरोपीयन चिकेन टिक्का पर एना टूटल जेना कोनो भारतीय नहि टूटैत छैक. केवल एकटा टिक्का हमरा हिस्सा मे आयल मुदा ओकर छिकार हम लैम्ब-मीट बाल सँ पूरा कऽ लेलहुँ. सन्तोला’क रस सँ अपन पेट भरय पड़ल. याद आबए लागल गाम’क भोज. नाक तक खेबाक १००% गारन्टी. जतय खाना’क मात्रा केँ ओकर स्वाद सँ कोनो सम्बन्ध नहि.

राति के स्थानीय समय के अनुसार ९ बजे अपन रूम मे वापस आबि गेलहुँ. मुदा राति के ९ बजे धरि सूरज भगवान उगल छलाह. ओना तऽ हम सूतले छलहुँ मुदा भोर मे ओएह अमेरिकन प्रोफेसर कहलाह जे भोर मे साढ़े तीन बजे एतय सूरज उगि जाइत छैक.

दोसर दिन:
दोसर दिन सम्मेलन मे हमरा टाक देबाक छल आ सँगहिँ एकटा सेशन के चेयरिँग से करबाक छल. इन्डिया सँ चलय सँ पहिने स्लाइड बनेने नहिँ छलहुँ. तेँ भोरे भोर उठि केँ स्लाइड बना लेलहुँ आ नास्ता करबाक लेल चलि गेलहुँ. इन्डिया सँ गेस्ट हाउस बुक करेबा सँ पहिने मालूम भेल जे रूम’क सँग स्काटिस नास्ता फ्री भेटैत छैक. नाश्ता सचमूच बेजोड़ छल. ब्रेड-रोल, कटलेट, तरल माछ, दलिया, सोयाबीन’क खीचड़ी, टोस्ट, दही, कोक, जूस, चाय काफी आ सेव-सन्तोला. एतय एकटा बात कहबाक बहुत जरूरी छैक जे अन्ग्रेज लोक नाश्ता के खाना सँ बेसी महत्व दैत छैक. आ नाश्ता मात्रा के दृष्टि सँ सेहो लन्च सँ बेसी होइत छैक. एतुका समय के अनुसार भोर मे आठ बजे नाश्ता’क लेल पहुँचलहुँ. एहि समय मे इन्डिया मे एक बजैत छल जे लन्च’क स्माय होइत छैक. जमि के नाश्ता केलहुँ, बेसी ध्यान तरल माछ पर रहय.

ओकर बात डैविडह्यूम टावर पहुँचि अपन कन्फ्रेन्स हाल मे गेलहुँ. डेढ़ बजि धरि सेशन चेयर केला’क बाद अपन प्रेजेन्टेशन देलहुँ ओकर बाद पैदल घूमए निकलि गेलहुँ. स्थानीय लोक’क लेल ई गर्मी के समय अछि. मुदा तापमान एखनो १५ डीग्री सँ बेसी नहि रहैत छैक. बी.बी.सी. पर सुनने छलहुँ जखन ब्रिटेन मे रौद निकलैत छैक ते आफिस सब मे छुट्टी भऽ जाइत छैक. ओएह दृष्य देखबा मे आयल. एडिनबर्ग यूनिवर्सिटी के मैदान मे पहुँचलहुँ. लड़का लड़की सब ग्रुप बनाय खेलैत छल. किओ फ्लाईँग दिस्क, किओ फुटबाल आ किओ टेनिसबाल क्रिकेट. मोन भेल जे क्रिकेट खेलाबी. मुदा फोटो खीचबा मे व्यस्त भऽ गेलहुँ. एकटा टोली मिलि के ड्रम बजबैत छल. ओहि मे एकटा नीग्रो’क उत्साह देखय वाला छल. ओकर दूर मे एकटा पैघ वैन ठाढ़ छल. ओहि पर लिखल छल “एडिन्बर्ग ड्रमर्स एशोसिएशन”. अन्ग्रेजी मे लिखल छल हकर मतलब छल…”हमर सँग आउ, ड्रम बजाबू, टेन्शन दूर करू”. कनि देर’क लेल सोच मे पड़ि गेलहुँ भारत मे एहेन तरह’क ग्रूप होयत ते की नाम होयत. “हमरा लग आऊ, कबड्डी खेलु आ टेन्शन दूर करू.”
ओकर बाद मे किछु आओर आगू बढलहुँ. एकटा प्राइवेट पार्क छल. ओहि बहुत प्रेमी जोड़ा आ एकटा पती-पत्नी देखलहुँ. पति पत्नी अपन जुड़वा बेटा केँ पार्क मे घुमा रहल छलाह. दुनू टा बच्चा बहुत सुन्दर छल. मोन भेल फोटो खीचि लिअ. ओहि आदमी सँ पुछलहुँ, ओ आदमी अपन कनियाँ सँ पुछलाह-”दिस जेन्टलमेन्ट वान्ट टू हैव अ फोटोग्रफ ओफ़ जिम्मी”. हुनकर कनियाँ शीघ्र तैयार भऽ गेलीह. आ फोटो खीचल गेल जे बगल मे अछि. एकटा बात ध्यन देबाक अछि जे दुनू टा बच्चा के डाँड़ मे रस्सी लागल अछि. जेना इन्डिया मे कुत्त सब केँ लागल छैक. हमर बौआ ते घर सँ निकलला’क बाद कखनो कोरा सँ नहि उतरैत छथि. आ यदि उतरैत छथि ते एना भागम दौर करैत छथि जे हुनका उतरय नहि दैत छियन्हि. तेँ की एत्तेक बदमाशी केलाक बादो हम हुनका कुकुर जेकाँ डाँड़ मे डोरी बान्हि घुमेबन्हि. कथमपि नहिँ.

रास्ता मे एकटा चीज आओर बेजोड़ भेटल. एता ठेला पर शराब बिकैत छलैक. लोक सबसँ सुनलहुँ जे स्काट्लैन्ड निवासी दुनियाँ मे शराब पसन्द करय वाला कम्यूनिटी मे दोसर स्थान पाबैत छैक. ठेला पर शराब आ बीयर के दूकान एकर सद्यः उदाहरण छल.
ओकर बाद एडिनबर्ग शहर के छोट छोट गली मे भटकैत छलहुँ. छोट छोट दोकान सब मे पर्यटक’क लेल स्काट्लैण्ड’क पारम्परिक परिधान ४०० पाउण्ड मे भेटैत छल. ओएह परिधान जकरा पहैरि काल्हि राष्ट्रीय सँग्राहालय मे ओ कलाकार हमरा लोकनिक स्वागत केने छलाह. छोट छोट कनियाँ-पूतरा से बिकैत छल ओएह परिधान मे. दिन भरि थकला के बाद गेस्टहाउस आबि सूति गेलहुँ. भारत आ स्काट्लैन्ड मे बहुत समानता देखय मे आयल. ओहि मे सँ निम्न समानता बहुत महत्वपूर्ण अछि.
१. अमेरिका सँ भिन्न भारत आ स्काट्लैन्ड दुनू जगह मे लोक सब सड़क पर पैदल चलैत छथि.
२. सड़क कम चाकर आ भीड़ भाड वाला होइत छैक.
३. सड़क के किनारा पर ठेला पर समान बिकैत छैक
४. अतिथि देवो भव दुनू जगह मानल जाइत छैक.
५. खेबा पीबा मे दुनू जगह के लोक शौकीन होइत छैक.
६. चिकेन टिक्का दुनू जगह पसन्द कायल जाइत छैक.
मुदा दालि भात तरकारी’क अनुपस्थिति यात्री जी कविता याद दिआ दैत छल;

अहिबात’क पातील फोडि़ फाड़ि
हम जा रहल छी आन ठाम
माँ मिथिले अन्तिम प्रणाम.

एहि लेख मे हम बात करब एकटा नव ब्लोग’क. एकर नाम थीक समदिया…. हमरा बुझने समदिया’क अर्थ होयत अछि एहेन आदमी जे एक जगह के सँवाद केँ दोसर जगह मे पहुँचाबे. पौराणिक समय मे एहेन आदमी केँ दूत कहल जाइत छलैक. कोनो भी समाज मे दूत’क बहुत महत्वपूर्ण स्थान होइत छल. दूत लोकनि एतबे महत्वपूर्ण होइत छलाह जे यूद्धो के समय मे दूत लोकनि के उपर किओ हाथ नहि लगबित छलाह. रमायण मे जखन अँगद के रावण पकड़बाक लेल कहलथिन्ह ते विभीषण हुनका सावधान केने छलथिन्ह जे दूत केँ नहि छुबल जाए नहि ते अनर्थ भ’ जायत. रावण नहि मनलाह आ ओकर फल हुनका भोगय पड़लन्हि.

समदिया’क एक टा आओर मतलब होइत अछि… हिन्दी मे एकरा सँवाददाता’क नाम सँ जानल जाइत अछि. चलू एतय जे समदिया’क बारे हम बात करैत छलहुँ ओ पेशा सँ पत्रकार छथि. लिखनाई पढ़नाई हुनकर प्रकृति मे छन्हि आ एहि ब्लोग’क शुरुआत किछु उद्देश्य सँ कयने छथि.  समदिया’क लेखक छथि श्री रोशन झा. हम रौशन झा जी’क बारे मे की लिखब चलू हुनके मुँह सँ सुनु:

हमर नाम रौशन झा छी आ गाम मधुबनी जिलाक लखनौर गामक रहिका टोल परैत अहि। स्कूलक शिक्षा गामक स्कूल सं पूरा केला के बाद दिल्ली के रुख कायल। उंच शिक्षा दिल्ली विश्वविद्यालय सं पूरा केलों। हिंदी विषय में एम् ए केला के बाद पत्रकारिता कायल आ सम्प्रति देशक प्रतिष्ठित अख़बार अमर उजाला में बतौर खेल पत्रकार कार्यरत छी। हमर पता रौशन कुमार झा ११५७, टाइप – २ तिमारपुर, दिल्ली – 54 फ़ोन 9350216092

समदिया जी कनि मनि हमरो लोकनिक उपर मे ध्यान देबैक.

दोसर बात मोन पड़ल जे हम अपन पापा केँ प्रणाम किएक करैत छी. की केवल हाथ मिलेला सँ काज नहि चलि जायत. विदेश मे ते लोक केवल हाथे टा मिलबैत छैक ते की विदेश’क लोक अपन बाप आ माई सँ प्रेम करनाई बन्द क’ दैत छैक. आ विदेशे के बात किएक, मानि लिअ हमरा अपन पापा’क प्रति ओएह श्रद्धा, ओएह प्रेम आ ओएह आदर रहय मुदा हम हुनका पैर छुबि केँ नहि हुनका सँ हाथ मिला के अभिवादन करी ते की हमर आदर हुनका लेल कम भ’ जायत… इत्यादि…इत्यादि…

हम अपन पापा केँ पैर एहि कारण नहि छुबैत छी जे हमरा पापा’क प्रति आदर अछि वा हम हुनकर सम्मान करैत छिअन्हि. बल्कि एहि दुआरेँ कि ई हमर सँस्कृति थीक. बिना पैर छुने सेहो हम हुनकर सम्मान क’ सकैत छिअन्हि मुदा बिना पैर छुबे वला सम्मान’क माप अलग होयत आ पैर छुबि केँ जे सम्मान दैत छियैक ओकर बात अलग. अतएब ई बात ते तय छैक जे कोनो भी सँस्कृतिक किछु एहेन बात होइत छैक जकरा कोनो तर्क द्वारा सिद्ध नहि कयल जा सकैत छैक. ओ स्वँय-सिद्ध होइत छैक. सँस्कृति’क एकटा आओर बात होइत छैक जे समय ओकरा उपर मे बहुत प्रयोग केने रहैत छैक कालान्तर मे ओहि मे कोनो बदलाव नहि होइत छैक. पैर छुबि केँ अपना सँ श्रेष्ठ व्यक्ति केँ अभिवादन करनाय एकर सबसँ विशेष उदाहरण थीक.

समय के साथ सँस्कृति मे बदलाव आबैत छैक. एक सँस्कृति टहलि केँ दोसर सँस्कृति’क लग पहुँचैत छैक, फेर ओ एक दोसर’क अवयव’क फेर बदल करैत छैक आ एहि सँ सँस्कृति मे बदलाव आबैत छैक. आ एहि बदलाव सँ  सँस्कृति’क विकास क्रमशः होइत जाइत छैक.

सँस्कृतिक विकास आ बदलाव सगरे भ’ रहल अछि. एकर असर मैथिल’क विवाह पद्धति पर सेहो पड़ल अछि. निम्न चीज जे पहिने मैथिल’क विवाह मे नहि छल आब बहुत सामन्य भ’ गेल अछि:

१. जयमाल: एहि विधि  मे कन्या आ वर एक दोसर केँ माला पहिराबैत छथि. वर आ कन्या दुनू परिवार’क लोक आ बराती मौजूद रहैत छैक.

२. जूता चोरी: पहिने ई प्रथा पूर्वी उत्तर-प्रदेश मे प्रचलित छल, जाहि मे कन्या’क बहिन मिलि वर’क जूता चोरी करैत छथि आ वापस तखने करैत छथि जखन वर’क तरफ सँ किछु गिफ्ट भेटि जाई.  आब मिथिला’क लगभग प्रत्येक कोन मे ई प्रचलित अछि.

आधूनिक मैथिल केँ जे सबसँ खराप लागैत छैक ओ छैक जे मैथिल’क विवाह मे कोनो नाच गाना नहि होइत छैक. आ क्रमशः आब किछु विवाह मे ई शुरु भ’ गेल अछि. हमर कहब केवल एतबे अछि जे कोनो ते लक्ष्मन रेखा खीच’क चाही जकरा अपना लोकनि केँ नाँघबाक नहि चाही. नहि ते आई अपना लोकनि नाच गाना आर्केस्ट्रा के रीकमेन्ड करैत छी, काल्हि दारू शराब केँ आ परसू किछो आओर केँ.

एहि क्रम मे केवल मैथिले यूवक एकरा नियन्त्रित कय सकैत छथि. तेँ विवाह मे किछु नव करबा सँ पहिने एक बेर जरूर सोची जे कालान्तर मे ओकर केहेन प्रभाव पड़त.

जे यदि कखनो नाग साँप आ मैथिल दू टा एकसाथ सामने आबि जाय ते नाग साँप केँ छोडि पहिने मैथिल के मारबाक चाही. मतलब ई जे बिहारी बहुत बढियाँ आ मैथिल बहुत खराब. ई मानसिकता ओएह इमेज’क प्रभाव थीक जाहि सँ भारत विश्व मे खराब आ बिहार भारत मे.

एहि मानसिकता प्रभाव हर जगह पड़ल अछि. एकरा कारणे जे किछु बिहार मे डेवेलपमेन्ट भ’ रहल अछि ओ केवल पटना आ आसपास मे सिमटि केँ रहि जैत अछि. एकरा लेल आवाज उठनाई शुरु भेल आ ओकर असर ई भेल जे नेता सभ’क आँखि मिथिला क्षेत्र तरफ होमय लागल. 

हाल’क दिनि मे पटना मे आई.आई.टी आ आई.आई.एम खोलबाक विचार चलि रहल छल. पटना’क बिहटा मे आई.आई.टी.’क लेल जगह सेहो तय भेल. तेँ संगहि मिथिला क्षेत्र मे एकटा कोनो पैघ सँस्था खोलबाक विचार भेल. एहि क्रम मे दरभन्गा मे आई.आई.आई.टी खोलबाक विचार सुनबा मे आयल. एहि सँ पहिने कि मैथिल लोकनि प्रसन्न भ’ जाथि पहिने ई जानबाक अति आवश्यक जे ट्रिपल आई.टी नामक सँस्था की होइत अछि.

आई.आई.आई.टी (IIIT) भारतवर्ष मे सूचना प्रैद्योगिकि’क बढैत सोफ़्टवेयर ईन्जिनीयर’क मांग लेल विशेष रुप सँ खोलल गेल छल. एहि मे दू तरहक सँस्था रहैत छैक. सरकारी आ निजी क्षेत्र द्वारा प्रायोजित.  ईलाहाबाद आ जबलपूर (आदि) सरकारी सँस्था थीक. आ हैदराबाद, बन्गलोर, पूना, कलकत्ता, त्रिवेन्द्रम इत्यादि निजी क्षेत्र द्वारा प्रायोजित थीक.

हमर आई.आई.आई.टी सँ काफी पूराना स्म्बन्ध अछि. हमरा हिसाब सँ निजी क्षेत्र’क द्वारा प्रायोजित आई.आई.आई.टी चाहे बहुत बढियाँ वा बहुत खराब अछि. जेना हैदराबाद आ बन्गलोर’क बहुत बढियाँ अछि. यदि केओ एकर तुलना आई.आई.टी सँ करताह ते कोनो खराप नहि, वस्तुत: आई.आई.टी के कान काटैत छैक. मुदा कलकत्ता, पूना आ त्रिवेन्द्रम के बहुत खराब अछि. कलकत्ता’क जतय बन्द होईक कगार पर छैक, पूना’क आई.आई.आई.टी’क अधिकाँशत: कोर्स मान्यता प्राप्त नहि छैक. एहि सभ’क एक्केटा मूल कारण छैक, जे निजी क्षेत्र द्वारा प्रायोजित सँस्था मे फण्ड’क कमी छैक. प्रोफेसर केँ सैलरी नहि भेटैत छैक.

सरकारी आई.आई.आई.टी’क स्थिति सामान्य छैक, आ एकर तुलना एन.आई.टी सँ कयल जा सकैत छैक.

तेँ अपना लोकनि केँ एक्के परिस्थिति मे खुश होयबाक चाही जखन दरभन्गा मे सरकारी आई.आई.आई.टी खुलय. अन्यथा एकरा बिहार सरकार द्वारा एकटा आओर प्रोपेगेण्डा बुझि एकर बहिष्कार करक चाही.

आब मुख्य मुद्दा पर आयल जाए. ओना ते हम एहि किताब’क बारे मे बहुत सुनि चुकल रही, गोरखपूर’क रेलवे लाइब्रेरी मे एकर हिन्दी अनुवाद पढने छलहुँ मुदा मैथिली मे पढबाक तीव्र इच्छा छल. राजीव जी एहि एकरा साकार केलन्हि. 

किताब’क भूमिका बहुत नीक लिखल गेल अछि. आ हरिमोहन बाबु जे दूनिया मे ह्यूमर’क सम्राट थीकाह, हमरा बुझने कनिएँ कनिएँ लेल चुकि गेलाह. जेना भूमिका मे लिखल गेल अछि जे ई पोथी पत्रिका मे प्रकाशित अनेक लेख ‘क सँग्रह थीक, ओहि हिसाब सँ ते ठीक मुदा एकेटा कमी महसूस भेल. हम ई बात नहि बुझि सकलहुँ जे एहि किताब’क माध्यम सँ हरिमोहन बाबु’क की मैसेज देबय चहाइत छलाह? हुनकर उद्देश्य की छलन्हि?. की केवल मैथिल’क पोल खोलनाई वा उत्कृष्ट व्यँग वा किछ आओर? किताब पढला सँ मालूम होयत अछि जे टुकड़ा-टुकड़ा मे लिखल गेल एहि किताब कोनो विशेष उद्देश्य नहि. हमरा हिसाब सँ, मनोरँजन’क वास्ते लिखल गेल एहि किताब केँ मनोरँजन लेल केवल पढबाक चाही.

एहि पोथी सँ लेखक’क विद्वता’क अभाष होइत अछि. हुनका सब वेद आ पुरान’क ग्यान छलन्हि से प्रत्येक शीर्षक पढ़ला सँ बुझना जाइत अछि.  एहि किताब’क निम्न विशेषता अछि.

किताब’क दू टा कन्ट्रेडिक्ट्री कन्सेप्ट अछि. पहिल ई जे मैथिल सँस्कृति बहुत नीक थीक आ दोसर जे मैथिल सँस्कृति बहुते खराप. मैथिल’क सँस्कृतिक विशेषता ओ चुडा-दही-चीनी नामक चेप्टर सँ केने छथि. पुरे लेख मे ओ चुडा दही चीनी आ मैथिल’क सँस्कार’क वर्णन कयने छथि.  जेना उदाहरण’क तौर पर ओ कहैत छथि जे भोजन’क गुणे आदमी’क सँसकार होइत अछि. बङाली मिठाइ खा’ केँ आलसी होइत अछि, पश्चिम’क लोक (यू.पी. आ दिल्ली) के रोटी खा खा केँ कठोर भ’ जाइत अछि आ मैथिल लोकनि चुड़ा दही चीनी खा-खा केँ सरस आ कोमल भेल रहैत छथि. ओ इहो लिखने छथि जे चूकि मैथिल लोकनि अपन भोजन मे खट्टा आ मिरचाय’क प्रयोग हरदम करैत छथि तेँ दुआरे अपना मे ओ कटौझ करैत छथि. हुनकर एकटा चेप्टर चाण्यक्य पर आधारित अछि. पूरे चैप्टर मे ओ आर्गुमेन्ट देने छथि जे चाण्यक्य आओर किओ नहि एकटा मैथिल रहथि. हुनकर तर्क रहनि जे एहेन जिद्दी आ स्वाभिमानी मैथिल छोड़ि आओर किओनहि भ’ सकैत छथि.

एतय तक त ठीक मुदा बाँकी चैप्टर मे ओ मैथिल’क सँस्कृति आ धर्म पर खिद्दान्स कयने छथि. एहि सँस्कृति’क जतेक बुराइ भ’ सकैत छैक ओ ओतेक कयने छथि. हमरा बुझने हरिमोहन बाबु’क सन लेख’क यदि चाहतथि तेँ ओ चुड़ा-दही-चीनी जेकाँ आओर चैप्टर जोडि के पुरा किताबे केँ एकटा उत्कृष्ठ व्यँग बना सकैत छलथि, मुदा धर्म’क आलोचना केला सँ हुनका बेसी लोकप्रियता नहि भेटलन्हि.

अभिव्यक्तिक स्वतँत्रता अपना लोकनि केँ किच्छो करबाक छुट दैत अछि, मुदा एकर मतलब ई नहि जे अपना लोकनि एकटा साधारण मानव केर सँवेदना केँ बिसरि किछो लिखि दी.

ई त भेल पूरा किताब’क निगेटिव चीज. मुदा जे किओ साहित्य सँ प्रेम राखैत छथि आ व्यँग मे रुचि छन्हि हुनका लेल एहि किताब’क जेकाँ कोनो किताब नहिँ. देशी भाषा मे बहुत दम होइत छैक आ देशी भाषाक प्रयोग (अधिकाँश्त: देशज शब्द’क) प्रयोग सँ एहि किताब मे चारि चाँद लागि गेल अछि. एकटा उदाहरण लिअ. खट्टर काका दलान पर बैसल छलाह:- लेखक भोरे भोर महाभारत’क मन्त्र पढि आगू जाति छलाह, जाहि मे यूधिष्ठिर’क बखान छलैक. खट्टर काका कहय लगलाल: हाँ हाँ भोरे भोर कोन अगत्ती सब के नाम लैत छह.

कुल मिला केँ हम इएह लिखब जे हरिमोहन झा जी सन लेखक यदि चाहिथैत तेँ बिना धर्म आ सँस्कृतिक निन्दा केने चुडा-दही-चीनी केँ आगू बढबैत बहुत बढिया लिखि सकैत छलाह. तथापि,  यदि साहित्य केर दृष्टि सँ देखल जाए ते व्यँग आ ह्यूमर’क ई किताब एकटा अति विशिष्ठ उदाहरण अछि.

—पद्मनाभ मिश्र

प्रिय मैथिल बन्धु;
हमर नाम पद्मनाभ मिश्र थीक.एहि ब्लोगक शीर्षक पढ़ि कनिएँ अजीब सन जरूर लागल होयत. मुदा जेहने नाम ओहने काज. मतलब ई एकटा प्रयास अछि जाहि मे एकटा कहानी लिखबा के कतेको लेखक’क योगदान रहतन्हि. एतय हम सब मिलजुलि केँ समुहिक योगदान सँ साहित्य स्रीजन करब.एक कहानी’क शुरुआत किओ करताह, परवान किओ आर चढ़ौथीन्ह आ खतम किओ आर करथीन्ह. बस अपने सँ अपेक्षा जे कहानी’क नाँगरि बढ़ाबैत जाऊ… बढाबैत जाऊ ताबय तक जाबय तक खतम करबाक स्थिति नहि आबि जाए. एकरा कहल जाइत अछि कोलोबोरेटिव लिटेरेचर यानी स्वंयसेवी साहित्य….मैथिली